देह धुर्रा के ढेर रे संगी

देह धुर्रा के ढेर रे संगी देह धुर्रा के ढेर रे संगी, एकर का भरोसा, देह धुर्रा के ढेर रे संगी, एकर का भरोसा, हवा चलिस त उड़ जाही, का राजा का रोसा।

देह धुर्रा के ढेर रे संगी

देह धुर्रा के ढेर रे संगी, एकर का भरोसा,

देह धुर्रा के ढेर रे संगी, एकर का भरोसा,

हवा चलिस त उड़ जाही, का राजा का रोसा।

साँस के डोरी बंधे हवय बस, पल-दू पल के आस,

काल झपट्टा मार लेही, रहि जाही खाली साँस।

देह धुर्रा के ढेर रे संगी...

मन के भीतर मनखे खोजत,

उमर गिस बरबोसा।

एके बात ल सच मानेनव,

दुनिया लागिस धोखा।

ओही सच के राख समेटत,

भीतर सूत जरिस।

जेन ल हीरा समझत रहेंव,

ओ त काँच निकरिस।

देह धुर्रा के ढेर रे संगी...

जेन ल पाना समझत रहेंव,

ओ त छैयाँ निकरिस।

दउड़त-दउड़त दिन ढलगे,

हाथ म धूर बचरिस।

समय कहिस – "चल संग मोर",

मंय कहेंव – "थोरिक ठहर"।

ठहरत-ठहरत साँझ होगे,

भोर गिस कब उतर।

देह धुर्रा के ढेर रे संगी...

मोर कहिके जेन समेटेंव,

ओ सब परछाईं रिहिस।

जेन ल छोड़ेंव अपन समझके,

ओही असली मंहीस।

नदी किनारे पियासे बइठेंव,

पानी खोजत-खोजत।

अपन अँजोरी बंद रखे रहेंव,

किस्मत कोसत-कोसत।

देह धुर्रा के ढेर रे संगी...

अब जब पाँव म ताकत नइये,

आँखी म उजियारा कम।

तब समझ म आये रे संगी,

रद्दा नई, चलना धरम।

मंदिर-मंदिर भटकत रहेंव,

देव खोजत रोज।

जीना खुदे परसाद रहिस,

साँस-साँस म भोज।

देह धुर्रा के ढेर रे संगी...

जिनगी भर परदा उठावत,

भेद खोजत रहेंव।

तमाशा देखे बर निकरेंव,

खुदे तमाशा बन गेंव।

खाली हाथ आइस दुनिया म,

खाली हाथ जाबो।

नेकी के दू फूल छोड़के,

का संग ले जाबो?

देह धुर्रा के ढेर रे संगी, एकर का भरोसा,

हवा चलिस त उड़ जाही, का राजा का रोसा।

- नितेश बनाफर 

अकलतरा, छत्तीसगढ़

मोबा. नं: 6267660114